*مانگے کا اجالا*
اردو کے گم شدہ الفاظ
کم لوگ ہیں جو ان گمشدہ الفاظ کو جانتے ہوں گے دل چاہا نئی نسل کو ان سے روشناس کرایا جائے
رکابی
پلیٹ کو کہتے تھے
سینی
گول بڑی پلیٹ یا پلیٹر کو کہتے تھے
سلفچی یا چلمچی
خوبصورت سا پیتل کا ایک برتن جس میں مہمانوں کے ہاتھ کھانے سے پہلے دھلوائے جاتے تھے
الگنی
وہ رسی جس کو دیوار پہ باندھا جاتا تھا اور اس پہ کپڑے سکھائے جاتے تھے
طاق
دیوار میں بنی ایک چھوٹی سی بغیر دروازے کی کھڑکی جس میں سرِ شام چراغ جلا کے رکھے جاتے تھے
گھڑونچی
لکڑی سے بنایا گیا ایک سٹینڈ جس میں اوپر کی جانب دو یا تین بڑے بڑے سوراخ ہوتے تھے جس میں مٹکوں کے پیندے سما جاتے تھے تاکہ گرنے سے بچ سکیں
نعمت خانہ
لکڑی سے بناٸی گٸی ایک خوبصورت سی الماری جس کی لمبائی چوڑائی ایک فریج کے برابر یا چھوٹی بھی ہوتی تھی لیکن اس کی دیواریں چاروں طرف سے جالی کی لگائی جاتی تھیں تاکہ اس میں ہوا گزرتی رہے اور اس میں رکھی جانے والی کھانے کی چیزیں ٹھنڈی رہیں اور خراب نہ ہوں
تلہ دانی
چوکور کپڑے کو مثلث نما سی لِیا جاتا تھا اور اس کے ایک کونے پر ایک خوبصورت ڈوری لگائی جاتی تھی جس سے اسے گول کرکے باندھ دیا جاتا تھا یہ عمومًا سوئی دھاگہ ریلیں رکھنے کے کام آتی تھی
بھگونہ
ایک کھلے منہ کی چھوٹے کنارے کی پتیلی جس میں عمومًا چاول پکائے جاتے ہیں
بادیہ
تانبے کا بنا بڑا سا کھلے منہ کا کٹورہ جس میں بچا ہوا گوندھا آٹا رکھا جاتا تھا
کٹورہ
یہ بھی تانبے کا بنا ایک خوبصورت کٹ ورک سے بنا برتن ہوتا تھا جس کے اوپر اس کا ڈھکن جو آسانی سے کھولا اور بند کیا جا سکے اس کی جگہ آج کل ہاٹ پاٹ نے لے لی ہے
چھینکا
یہ لوہے کے چپٹے تاروں سے بنا جو آج کل کے مکرامے جیسا ہوتا تھا اسے ایک کنڈے میں چھت سے لٹکا دیا جاتا تھا جس میں دودھ کی دیگچی یا سالن کی پتیلیاں وغیرہ رکھ دی جاتی تھیں
سمسی
لوہے کا ایک قینچی نما کڑا جو پتیلیوں اور بھگونوں کو چولہے سے اتارنے کے کام آتا تھا۔
(ماخذ : علم و کتاب واٹس ایپ گروپ)
About The Author
